ڪراچيءَ ۾ طالبان جي موجودگيءَ واري سوال تي ٿيندڙ سياست 24 فيبروري 2014ع

ڪراچيءَ ۾ طالبان جي موجودگيءَ واري سوال تي ٿيندڙ سياست

سهيل سانگي,

سومر 24 فيبروري 2014ع

سنڌ ۾ طالبان آهن يا نه؟ سنڌ حڪومت جو ان بابت ڪو چٽو ۽ هڪڙو موقف ناهي. ڇنڇر واري ڏينهن سنڌ جي وڏي وزير سيد قائم علي شاهه اعتراف ڪيو هو ته سنڌ ۾ طالبان جي موجودگيءَ واري حقيقت کان انڪار نٿو ڪري سگهجي، پر 24 ڪلاڪن ۾ ان جي ابتڙ بيان ڏنو اٿس ته سنڌ ۾ طالبان موجود ئي ناهن. سنڌ ۾ طالبان جي موجودگيءَ وارو بحث ٽي چار سال پراڻو آهي. حڪومت انهن جي موجودگي مڃيندي به رهي آهي ته وري ان کان انڪار به ڪندي رهي آهي. شايد سڀ کان پهرين اهو معاملو ايم ڪيو ايم جي سربراهه الطاف حسين اٿاريو هو. هن جي مطالبي پويان اصل ۾ ڪراچيءَ اندر پختون آباديءَ ۾ واڌ ۽ انهن جي ”مڙسيءَ“ وارن عملن کان ڊپ هو، ڇاڪاڻ جو هن کان اڳ ڪراچيءَ جي سمينٽ جي جهنگ ۾ ايم ڪيو ايم اڪيلي شير بڻيل هئي، پر هاڻي پختون به کيس للڪارڻ لڳا هئا. ائين هن طالبان واري فلم پٺاڻن جي ڳچيءَ ۾ وجهي پنهنجو فائدو ڳولڻ ٿي چاهيو. پوءِ اهو معاملو سپريم ڪورٽ تائين پهتو، جڏهن سنڌ حڪومت کان پڇيو ويو ته اها 7 هزار طالبان جي ڪراچيءَ ۾ موجودگيءَ بابت عدالت کي آگاهه ڪري. ائين طالبان جي موجودگيءَ واري سوال کي سياسي مقصدن لاءِ استعمال ڪيو ويو. سنڌ حڪومت جي لاءِ اهو مسئلو بڻيل رهيو ته ڪٿي اهڙي بدامني ۽ دهشتگرديءَ جي واقعن کي صرف سنڌ جي حد تائين رکي ڳالهه ڪئي وئي ته ان جا ڇنڊا سنڌ حڪومت تي پوندا. اها ڳالهه تازو وفاقي گهرو وزير چوڌري نثار علي جي بيان بعد وڌيڪ چٽي ٿي آهي، جڏهن هن سنڌ جي حالتن يعني امن امان وغيره بابت ڳڻتي ظاهر ڪئي آهي. ساڳئي نوعيت جا واقعا خيبر پختونخوا ۾ به ٿين پيا پر ان بابت وفاقي گهرو وزير ڪجهه نه ڳالهايو. چوڌري نثار علي خان اصل ۾ بلاول ڀٽو زرداريءَ جي طالبان خلاف بيان ۽ سنڌ اسيمبليءَ ۾ طالبان سان ڳالهين بابت بحث جي موٽ ۾ سياسي طور سنڌ حڪومت کي ڦاسائڻ پيو گهري. سنڌ حڪومت جي اعلانيه موقف کي في الحال پاسيرو رکي ڳالهه ڪريون ٿا انهن واقعن جي تناظر ۾، جيڪي ويجهڙ ۾ وقوع پذير ٿيا آهن. ڪجهه واقعا هي آهن: 2. جنوريءَ تي 2 طالبان ويڙهاڪ منگهي پير واري علائقي ۾ رينجرز جي مقابلي ۾ مارجي ويا. انهن جو تعلق ولي الرحمان گروپ سان ڄاڻايو وڃي ٿو. . 7 جنوريءَ تي ايوب شاهه بخاري جي درگاهه واقع گلشن معمار وٽان ڇهن ماڻهن جا لاش مليا ۽ اتان هڪ پرچي به ملي، جنهن ۾ لکيل هو ته، ”مزارن جي حاضري ڀرڻ کان پاسو ڪريو.“ ان ڪارروائيءَ ۾ پوليس طالبان کي ملوث سمجهي ٿي. پوليس آفيسر چوڌري اسلم جي قتل جي ايف آءِ آر طالبان جي نالي تي ئي داخل ٿيل آهي. . 10 جنوريءَ تي 3 طالبان پوليس مقابلي ۾ مارجي ويا. . 17 جنوريءَ تي هڪ نجي ٽي وي چئنل جا 3 ملازم مارجي ويا. . اهڙي ريت رزاق آباد (ڪراچي) ۾ پوليس وين تي ٿيل حملي جي ذميواري به طالبان قبولي آهي. گذريل سال مارچ ۾ آءِ جي سنڌ پوليس فياض لغاريءَ چيو هو ته پوليس ٿاڻن ۽ گاڏين تي حملا طالبان ڪري رهيا آهن. هفتو کن اڳ سي آءِ ڊي جي اينٽي ٽيررزم يونٽ جي انچارج پوليس آفيسر راجا عمر خطاب ڪراچيءَ ۾ القاعده جي نيٽ ورڪ هجڻ جو انڪشاف ڪيو هو. طالبان بابت خود پيپلز پارٽيءَ ۾ به ڪا هڪ ۽ پختي راءِ جي کوٽ نظر اچي ٿي. پارٽيءَ جو نوجوان چيئرمين بلاول ڀٽو زرداري طالبان خلاف جهاد جي ڳالهه ڪري ٿو. قومي اسيمبليءَ ۾ پارٽيءَ جو اڳواڻ سيد خورشيد شاهه جي موقف ۾ لچڪ آهي، هو ڳالهين ۽ آپريشن ٻنهي جي ڳالهه ڪري ٿو. سنڌ جو وڏو وزير، جيڪو پارٽيءَ جو صوبائي صدر به آهي، تنهن جو موقف به خورشيد شاهه جهڙو آهي. پيپلز پارٽي ملڪ جي پهريون نمبر نه سهي، ٻيو نمبر وڏي پارٽي ضرور آهي. ان جو موقف سمورين سطح تي هڪ جهڙو هجڻ گهرجي. سنڌ جو وڏو وزير سيد قائم علي شاهه جو طالبان بابت ڦرندڙ موقف عجيب آهي ۽ ان کان وڌيڪ عجيب سندس اهو چوڻ آهي ته وفاقي حڪومت طالبان سان ڳالهيون ڪري ٿي يا آپريشن ڪري ٿي، اهو وفاقي حڪومت جو معاملو آهي، يعني هو ان سڄي معاملي کان لاتعلقي ڏيکاري سنڌ کي ڌر رکڻ لاءِ تيار ناهي. اها سڀني کي ڄاڻ آهي ته جيڪڏهن حڪومت آپريشن جو فيصلو ڪري ٿي ته ان جا سنوان سڌا اثر سنڌ تي پوندا. اتان جيڪا لڏپلاڻ ٿيندي، ان جي آخري منزل ڪراچي هوندي. اهو تجربو افغان جنگ دوران به ٿي چڪو آهي، جڏهن لکين افغاني اچي ڪراچيءَ ۾ آباد ٿيا ۽ ان بعد وزيرستان ۽ سوات ۾ ٿيل آپريشن جي نتيجي ۾ پڻ بي گهر ٿيلن جون وڏيون کيپون سنڌ آيون. آپريشن جي ستايل انهن ماڻهن جي اڏ ۾ ڪي دهشتگرد ۽ ڏوهاري به ضرور آيا آهن. وڏي پيماني تي انهيءَ آباديءَ جي اچڻ سان نه رڳو سنڌ جي وسيلن ۽ شهري سهولتن، روزگار وغيره تي دٻاءُ پيو، پر ساڳئي وقت تي قبائلي علائقن مان آيلن جي شهري علائقن ۾ آبادڪاري به مسئلا پيدا ڪري رهي آهي. ان سڄي صورتحال ۾ اهو چوڻ غلط آهي ته اهو وفاقي حڪومت جو معاملو آهي. ڇا سنڌ جو ان سان ڪجهه اچي نه وڃي؟! سنڌ جا ساڃاهه وند ماڻهو وفاقي حڪومت کي اهو پيا چون ته اهڙي ڪنهن فيصلي بابت سنڌ کان به پڇيو وڃي، ڇاڪاڻ جو آخر ۾ ڀوڳڻو سنڌ کي ئي پوندو. اسان جي حڪمرانن جا اهي حال آهن، جو اهي انتهائي اهم معاملن کي به سنجيده وٺڻ لاءِ تيار نه آهن.