تھر کے خواب اور کوئلہ
بینظیر بھٹو نے 1994ء میں تھاریو ہالے پوٹو کے قریب تھر کول فیلڈ کا افتتاح کیا اور اس کوئلے سے سمندر کے کنارے کیٹی بندر کے پاس بجلی گھر قائم کرنے کا اعلان کیا، مگر نواز شریف نے حکومت میں آکر اس منصوبہ کو سرد خانے میں ڈال دیا۔ جنرل مشرف نے بجلی کے بحران اور بعض دیگر وجوہات کی بنا پر تھر کے کوئلے میں ہاتھ ڈالا۔ ان کی سربراہی میں ایک کمیٹی بھی تشکیل دی گئی۔ مگر بیل منڈھے نہیں چڑھی۔ پیپلز پارٹی کے گزشتہ دور حکومت میں جوہری تونائی کے ماہر ڈاکٹر ثمر مبار ک کرشمے کا دعویٰ کر کے میدان میں آئے کہ وہ تین سال میں زیر زمین ہی کوئلے کو گیس میں تبدیل کر کے استعمال کی ترکیب سے پائلٹ پروجیکٹ شروع کر سکتے ہیں۔ تین سال 2013ء میں مکمل ہوگئے لیکن یہ پائلٹ پروجیکٹ بھی عمل میں نہیں آسکا۔ ان کا کہنا ہے کہ انہیں ایک ارب روپے کی ضرورت ہے جو نہ وفاقی حکومت دے رہی ہے اور نہ ہی سندھ حکومت۔ وزیر اعظم یوسف رضا گیلانی نے کئی مرتبی تھر کوئلے کو یاد کیا۔ لیکن کوئی عملی شکل نہیں نکال سکے۔ ان کے بعد آنے والے پیپلز پارٹی کے وزیر اعظم راجا پرویز اشرف نے تھر فیلڈ کا دورہ کیا اور ایک مرتبہ پھر تھر کے لوگوں کو آسرا دیا۔ مگر نتیجہ صفر رہا۔
تبدیل شدہ حالات میں نواز شریف 31 جنوری کو کوئلہ نکالنے اور اس سے بجلی گھر بنانے کا افتتاح کرنے جا رہے ہیں ۔آج تھر کا کوئلہ دوبارہ یاد آنے کے محرکات یہ ہیں:
الف) زرمبادلہ کی کمی تیل سے پیدا کی جانے والی بجلی کی مہنگائی کے باعث حکومت کے پاس کوئی چارہ نہیں تھا کہ وہ کوئلے کا آپشن اپنائے۔ (
ب) پنجاب 2009ء سے اپنے صوبے میں کوئلے سے بجلی تیار کرنے کے چھ بجلی گھروں پر ہوم ورک مکمل کرچکا ہے۔ وزیر اعلیٰ پنجاب کے حالیہ بیان کے مطابق اب ان پر کام شروع کیا جا چکا ہے اور چینی اور جرمن کمپنیوں سے معاہدے کئے جارہے ہیں۔ پنجاب اپنے سالٹ رینج سے کوئلہ نکالنے کیساتھ ساتھ بلوچستان کے چمالنگ کے مقام سے روزانہ 2400 ٹن کوئلہ حاصل کرکے بجلی گھر چلانے کا معاہدہ کرچکا ہے۔
ت) گڈانی میں کوئلے پر چلنے والے دس بجلی گھر بنانے کے لیے قطر اور چین سے معاہدے ہو چکے ہیں۔ یہ بجلی گھر پنجاب حکومت قائم کر رہی ہے جن میں درآمد شدہ کوئلہ استعمال کیا جائے گا۔
ث) ایشین ترقیاتی بینک پرانے بجلی گھر کوئلے پر شفٹ کرنے کے لیے بھی بھاری رقم فراہم کر رہا ہے۔ یعنی تھر کا کوئلہ استعمال نہیں کیا گیا لیکن ملک میں ڈیڑھ درجن بجلی گھر کوئلے پر بنائے جارہتے تھے ۔ یہ تمام بجلی گھر درآمد شدہ کوئلے پر ہی بنائے جارہے تھے۔ اس صورتحال نے کئی سوالات کھڑے کردیئے۔ مزید برآں یہ کہ نواز شریف کی وفاقی حکومت کی جانب سے سندھ کو نظر انداز کرنے پر مختلف حلقوں میں تنقید ہوئی ۔ اور سندھ حکومت بھی زیر تنقید آئی کہ وہ کچھ نہیں کررہی۔یہ ہے وہ پس منظر جس میں ایک بار پھر تھر کے لوگوں کے خواب زندہ کر لیے گئے اور سندھ حکومت اکتیس جنوری کو وزیر اعظم نواز شریف اور آصف زرداری کو تھاریو ہالے پوٹو لے کر جارہی ہے۔
نواز شریف پر سندھ میں یہ بھی سخت تنقید ہوتی رہی ہے کہ 90 کی دہائی میں انہوں نے کیٹی بندر، تھر کول سمیت سندھ کے بعض ترقیاتی منصوبے منسوخ کردیئے تھے۔ ان کے لیے یہ سنہری موقع تھا کہ وہ یہ تنقید دھو ڈالیں۔ یعنی رند کے رند رہے ہاتھوں سے جنت نہ گئی۔
تھر کے لوگوں کو ابھی تک یقین نہیں کہ اس پروجیکٹ پر واقعی عمل ہوگا۔ تھر کول بھی کالاباغ ڈیم کی طرح ہوگیا ہے۔ جس پر ہر فریق سیاست کر رہا ہے۔ کسی کو لالچ، کسی کو آسرا تو کسی کو خواب اور کسی کو اس سے ڈارایا جارہا ہے۔
تھر کول پروجیکٹ کے حوالے سے کئی کہانیاں ہیں۔ چونکہ یہ پروجیکٹ قومی اہمیت کا حامل ہے لہٰذا وفاقی حکومت نے 60 فیصد رقم فراہم کرنے کا اعلان کیا تھا۔ اس کے ساتھ سرمایہ کاروں کو مطلوبہ گارنٹی بھی دینے کا فیصلہ کیا تھا۔ ستم ظریفی یہ ہے کہ پیپلز پارٹی پانچ سال حکومت میں رہی لیکن اس نے مطلوبہ رقم فراہم کی اور نہ ہی گارنٹی دی۔ چینی کمپنی کے برسوں تک کام کرنے کے بعد بجلی کا نرخ دیا وہ بھی سرسری طور پر مسترد کردیا گیا۔ حالانکہ یہ نرخ آج کی صورتحال کو دیکھتے ہوئے کوئی زیادہ نہیں تھا۔ حالانکہ آج ہم تین اور چار گنا زیادہ نرخ ادا کر رہے ہیں۔
کراچی الیکٹرک سپلائی کارپوریشن اپنا ایک بجلی گھر کوئلے پر شفٹ کرنا چاہتی ہے۔ اس مقصد کے لیے بن قاسم پورٹ پر ایک نئی جیٹی بھی تعمیر کی جارہی ہے۔ سندھ حکومت میں اتنا نہیں کر سکی کہ وہ کے ای ایس سی اور گڈانی میں زیر تعمیر دس بجلی گھروں کو پابند بنائے کہ وہ درآمد شدہ کوئلے کے بجائے تھر کا کوئلہ استعمال کریں۔ یوں امپورٹ پر خرچ ہونے والی بڑی رقم بچ جائے گی۔ اور بجلی کی لاگت میں بھی کمی واقع ہوگی۔ اینگروکمپنی جو تھر میں کول پروجیکٹ شروع کر رہی ہے اس کی فرمائش ہے کہ اسے جامشورو کا بجلی گھر بھی بیچ دیا جائے۔ تعجب کی بات ہے کہ نئے پروجیکٹ شروع کرنے والی کمپنی کی آنکھ بنے بنائے اثاثوں پر ہے۔
کوئلے کا پروجیکٹ شروع ہونا اچھی بات ہے۔ کہا جارہا ہے کہ اس سے اس کے ساتھ ساتھ تھر کے لوگوں کو برسوں سے دکھائے جانے والے خواب کی حقیقت کیا ہے اس کا بھی پتہ لگے گا۔ تھر میں کوئلہ اوپن پٹopen pit کے ذریعے نکالا جائے گا۔ یعنی ایک وسیع علاقے میں تین سے چار سو فٹ تک کھدائی ہوگی۔ اس سے زیر زمین پانی کے ذخائر بری طرح سے متاثر ہونگے۔ درخت ، پودے، پرندے اور مال مویشی کے لیے مطلوبہ ماحول ختم ہو جائے گا۔ یہ بات قابل ذکر ہے کہ مویشی پالنا تھر کے لوگوں کا دوسرے نمبر پر ذریعہ روزگار ہے۔ اس کے علاوہ متاثرہ علاقے میں گھر، گاؤں، کھیت اور آسائشی زمین بھی متاثر ہوگی جو کہ یہاں کے غریب لوگوں کے جینے کے اہم وسائل ہیں۔ اس صورتحال کے باوجود متاثرہ لوگوں کی بحالی کے لیے کوئی پالیسی نہیں بنائی گئی ہے۔ جب کہ پوری دنیا میں تیل، گیس ، کوئلے اور دیگر معدنیات کی کھدائی کے لیے متاثرہ علاقوں میں بنائی جاتی ہے ۔ سٹلمنٹ پالیسی بنانے کا ٹھیکہ ایک نجی کمپنی کو دیا گیا تھا، جو کہ تین سال میں بھی یہ پالیسی نہیں بنا پائی ہے۔ اس حوالے سے اس کمپنی نے بعض سماعتیں کیں جن میں مجوزہ پالیسی کو لوگوں نے مسترد کردیا تھا۔ اب حکومت برطانوی راج کے قانون لینڈ اکیوزیشن ایکٹ مجریہ 1848 کے تحت لوگوں سے زمینیں لے رہی ہے۔ سامراجیوں کا بنایا ہوا قانون ہے جس کا مرکز لوگ نہیں بلکہ زمین اور وسائل تھے۔ یہ اس زمانے کا قانون ہے جب انسانی حقوق کا کوئی تصور ہی نہیں تھا۔ تھر کے لوگ کوئلہ نکالنے پر ناخوش نہیں۔ ان کی صرف اتنی سی فرمائش ہے کہ یہ زیر زمین وسائل ان کے ہیں اور وہ بھی اس قوم کا حصہ ہیں اور اس ملک کے شہری ہیں۔ انہیں اور نہیں کم از کم اپنے وسائل میں تو حصہ دیا جائے۔
Labels: Islamkot, Nawaz SHarif, Sohail Sangi, Thar, Thar coal, zardari, سہیل سانگی، سھیل سانگی
